經歷咗兩年幾嘅疫情🦠，工作已經唔係好似傳統咁樣坐喺辦公室入面完成每日嘅事務，好多公司都開始實行真正嘅「彈性上班」政策🧑🏻💻，員工可以選擇喺屋企工作🏠，而遠端桌面工具提供咗最好嘅支援，令大家可以輕輕鬆鬆用屋企嘅電腦遠程連接去公司嘅電腦，進行文件共享、協作及技術支援，可以與同事共享屏幕，同時一齊處理好 project 同埋文件，團隊之間嘅溝通變得更加有效率同方便，完全實現咗隨時隨地咁自由工作。
基本上，遠端桌面工具喺而家嘅工作文化入面係不可或缺㗎，而家為大家介紹番現時最受歡迎嘅幾個遠端桌面工具啦❗👇🏻
1️⃣ TeamViewer
近呢兩年大家冇可能冇聽過嘅 TeamViewer 的確算係喺香港主流用緊嘅遠端桌面工具。佢可以跨平台連接，無論你係用緊 Windows、Mac、Linux 、Android 定係 ios，都可以輕鬆咁同其他設備連接，而且連接方法亦非常簡單，只需要設備之間共享一個唯一嘅 ID，就可以憑住呢個 ID 進行連接。至於連線品質亦非常有保證，好少會發生斷線問題。另外，TeamViewer 亦以數據加密同埋雙重身份驗證嘅方式確保連接嘅安全性，令你無後顧之憂咁進行遠程工作。值得一提嘅係個人非商用版本係會彈出廣告㗎，而且過度使用都會跳出付費嘅視窗。
2️⃣ AnyDesk
AnyDesk 講求嘅係速度流暢，基本上係而家熱門工具入面最快嘅🏃🏻，就算係直接遠端操控公司嘅電腦工作都冇問題，基本上係零延遲😍。佢亦可以跨平台連接，包括 Windows、Mac、Linux，甚至 Raspberry Pi，絕對滿足到你嘅遠端工作需要。連接方法同 TeamViewer 類近，只要輸入 9 位數嘅專屬號碼就可以連線。喺安全性方面，佢亦會進行數據加密同埋雙重認證，每次連接都要輸入密碼，保護好公司機密文件。不過 AnyDesk 商用版係目前最貴嘅遠端桌面程式🫨
3️⃣ Chrome 遠端桌面
Chrome 遠端桌面完全免費，使用方法勁簡單，只要登入同一個 Google 帳戶，加埋有 Chrome 瀏覽器再安裝遠端存取 extension 就可以使用㗎喇！不過喺功能上面就非常基本，唔支援檔案傳送、唔可以進行多設備連接等，喺使用上的確冇咁方便。
4️⃣ Window 遠端桌面
Window 遠端桌面係內置嘅遠端連接功能，但使用方法比 Chrome 遠端桌面複雜少少，需要喺自己電腦安裝番佢嘅程式，輸入番公司嘅 Window 電腦嘅 IP 地址或者主機名，提供番相應嘅資格認證，而且如果有防火牆或網絡設定，你又要先建立番 VPN 連接先可以喺唔同網絡之間進行番遠端連接。但係同Chrome 遠端桌面一樣只有基本嘅功能，使用上都係有啲唔方便。不過，喺11月嘅時候，Mircosoft 公佈咗新嘅 Window App，佢可以支援iOS、iPadOS 同埋 Windows 都可以連接遠端嘅 Windows 電腦🤩至於幾時推出，大家可以留意番 Microsift 最新嘅資訊喇❗
無論你係 Freelancer、遠程工作者定係企業員工，遠端桌面工具都係非常有需要㗎，而坊間嘅遠端桌面程式多不勝數，至於要點揀就視乎番大家嘅需要喇❗
