喺呢個世代，作為軟體開發者，你可以冇 Facebook 同 Instagram，但你唔可以冇 GitHub❗有咗佢，同 Partner 一齊遠端寫程式又得，搵資源又得，搵人集思廣益又得，完全滿足晒你多過三個願望😍而家同你講吓佢究竟係咩嚟咁犀利👇🏻
🌟咩係 GitHub？
講 GitHub 之前，大家要先知道一點👉🏻Git 同 GitHub 係兩樣嘢嚟㗎❗Git 係分散式版本控制嘅制式，主要係追蹤同埋管理番軟體開發嘅歷史版本，同步番開發者進行過嘅協作同埋修改。而 GitHub 係一個存放 Git 嘅空間🗃️ 即係比你開發軟體原始碼嘅地方，支援唔少主流程式語言，例如 Python、C++ 同埋 JavaScript 等。佢亦係一個開發者交流學習程式碼嘅主要社群😍
🌟GitHub 嘅功能
1️⃣ 托管程式碼🗃️：
GitHub 入面嘅專案都係將程式碼儲存喺裡面嘅倉庫，亦可以將每個專案分別儲存喺唔同倉庫入面，可以授權唔同嘅人拎到權限，就好似 Google Drive 咁，每一個項目都開番一個新嘅資料夾，可以自己揀番相關人士去修改或者查閱。當然啦，其實唔只程式碼可以，任何文件都支持㗎。
2️⃣ 版本控制⚙️：
佢嘅 Git Commit 功能會紀錄專案入面修改咗啲咩嘢，方便比你回顧每次改咗啲咩同埋必要嘅時候仲可以比你快速去番之前嘅歷史版本，減少錯誤嘅發生。
3️⃣ 多人協作🙌🏻：
佢可以多人同時喺同一個項目入面做嘢，唔洗受地理位置嘅限制。而且 GitHub 仲提供問題追蹤系統功能，團隊可以用佢嚟討論番程式碼嘅問題、佈置任務等，而且成員仲可以提交意見同建議去審查程式碼，令管理者更加容易去集中管理，亦唔洗等所有程式碼做完先再審查，成員亦可以專注喺專案嘅開發同修改，各司其職💪🏻。
4️⃣ 開源社群👥：
佢可以話係喺世界各地聚集咗一班頂級嘅開發人員，喺呢度你可以搵到好多出名嘅共享開源專案，你可以喺入面免費用同下載😍而且你分享出嚟嘅項目，其他人都可以參與同埋貢獻一份力幫你完善項目功能，例如 修復 bug、改善程式碼嘅質量等。
5️⃣支援持續整合✨：
佢仲支援持續整合（CI／CD）工具，例如佢自家嘅 GitHub Action，令你可以喺 GitHub Repo 入面自動執行各種工作流程，令測試更加有效率，團隊亦可以專注番喺程式碼嘅開發。
🌟GitHub 係唔係免費㗎？
佢分別提供免費同付費方案，兩個方案一樣可以建立公開或者私人嘅專案。佢哋嘅分別在於用嘅時數長短、人員數目多少等。大家可以根據番企業入面開發人員嘅數目、係咪重度使用而決定用邊個方案。
作為軟體開發者一日可能有幾百個 Git 要儲存同管理，咁佢會係最好嘅程式碼雲端託管平台等你同你嘅開發團隊可以輕鬆咁一齊喺上面共同開發同處理。即使係身處唔同地區都可以一齊遠端做嘢🧑🏻💻
