foundy-logo-bw

>>

提升剪片效率!3 個 AI 影片工具輕鬆製作影片

更新:2023-09-14

而家連新聞主播同港姐司儀都要用到 AI 嚟製作,我哋又點可以唔講吓 AI 影片製作嘅工具啊~以前我哋都係用 Premiere 或者 iMovie 呢啲工具嚟剪片,但係佢哋都有好多settings,要剪音效、插圖、加特效等等,仲要自己搵素材,逐句字幕加上去,諗起都好痛苦。今次會為大家介紹 3 個實用嘅 AI 影片工具,令你剪片可以更有效率!

 

1.「剪映」

「剪映」係一個大陸剪片 APP,功能好強大,最近加入咗 AI 文字生成影片嘅功能,可以用文字輸入指令俾佢,系統就會根據文字內容自動揀片段同埋圖片,仲有埋智能字幕功能,會按你輸入嘅文字自動配埋音,不過而家廣東話只有一種男聲,未有其他配音選擇。有咗呢個功能,咁你就唔洗做咁多嘢,又可以好快剪到一條片出黎啦!尤其係知識型嘅片,你只要打開頭同結尾描述就得,中間佢就會幫你處理,慳好多時間~最重要係「剪映」係完全免費!,可以喺 Mac 或者 Windows 電腦,同埋喺 iOS 、 Android 手機用都得。

 

  1. 「Pictory」

「Pictory」係一個可以將唔同長篇文本轉化成多媒體影片內容嘅工具,只要直接俾一篇網上文章嘅網址佢,佢自動就會幫你生成一個簡化版嘅劇本,然後再變成一條短片。系統仲可以揀唔同風格嘅範本,提供音樂曲目同AI轉語音等功能,而且唔使額外支付版稅。收費方面,免費版可以建立 3 個影片專案,每段影片唔可以超過 10 分鐘。

 

3.「Deepbrain AI」

「Deepbrain AI」同之前兩款工具唔同嘅地方係,呢款工具主要針對企業,提供 AI 虛擬角色(Avatar)嘅工具,就好似 AI 主播、港姐司儀個類。系統係整合咗 ChatGPT 同埋佢地自家嘅 AI Human 嘅 AI 影片工具。「Deepbrain AI」嘅特點係可以直接透過 ChatGPT 自動生成劇本,仲支援轉換 80 幾種文字嘅語音添,揀好適合嘅版型之後,再配搭埋虛擬角色作為影片嘅「旁白君」,咁樣就可以快速整好一段影片啦!

最新動態
風靡全球嘅對話式 AI 👉🏻 Poe
🧑🏻‍💻軟體開發架構點揀❓單體架構 🆚 微服務
💭 行銷必識.解構搜索引擎原理 🔎
更多相關