你有冇留意最近台灣一單好爆嘅新聞❓有網紅惡意利用換臉技術整色情片而比人拉咗🫨究竟呢一種 AI 技術原理係咩？點解可以整到好似真嘅一樣？答案係👉🏻Deepfake（深度偽造）❗不過，佢唔係一個唔好嘅嘢，問題嘅本身係睇你點利用個技術姐，而家一齊了解吓佢嘅原理同用途啦👇🏻
🌟Deepfake 原理
以前嘅 key 圖只係將相嘅人頭換做其他人頭做一啲搞笑圖，勁啲會用專業少少嘅程式整換臉圖。而家 AI 嘅興起，就有 Deepfake 技術嘅出現喇。佢係用「生成對抗網絡」(GAN, generative adversarial network) 嘅 AI 技術，一部分係創造影像，另一部分就係分析影像究竟夠唔夠真實，通過時間不停咁學習同調整就可以生成到超逼真嘅影像同聲音。
簡單啲講，就係搜集大量你嘅目標換臉對象嘅臉部圖片掉比程式嘅資料庫分析，將素材嘅對象同目標對象嘅樣盡量搵到類似嘅地方，減少喺影片上面穿崩嘅機會，即係提供嘅圖片越多，AI 學習得越好，咁就可以減少面部表情嘅破綻喇。
🌟Deepfake 嘅用途
1️⃣ 娛樂影視：
可以復活唔喺人世嘅明星或者創造唔洗真人演出嘅電影場景，就好似星球大戰外傳：俠盜一號片尾，後生嘅 Leia公主出現，令到星球大戰迷都好激動。
2️⃣ 教育：
可以令一啲歷史事件或者人物重現眼前，可以令學習上帶嚟新嘅改變。例如 Aflorithmic 語音服務新創公司就曾經出過一段片將愛因斯坦重現眼前，真係好似佢翻生咁㗎❗唔只係聲音重現，臉部表情都好自然㗎🤩
3️⃣ 新聞行業：
可以模擬報導入面嘅場景或者人物，即係可以唔洗真人都可以報導到新聞，或者將案件重現喺大眾眼前。
4️⃣ 醫療用途：
可以用技術合成聲音，令聾啞人士用原聲同其他人溝通。有消息講過美國波士頓兒童為唔可以講嘢嘅人做聲音重現，先將既有嘅聲音存取，用呢個技術合成最接近原音嘅呈現，令聾啞人士將來依然可以用原聲同其他人傾偈。呢個絕對係重大嘅突破❤️🔥
Deepfake 嘅出現喺唔同方面係開闊咗創新嘅可能，亦令到一啲產業嘅成本下降，但佢都帶嚟咗一啲嘅問題，例如係假資訊同影片充斥喺網絡產面，最出名嘅事件絕對係奧巴馬鬧川普係蠢材，真係震驚全世界㗎🫣另外，私隱上面都係一個問題，未經同意就惡意整一啲影片都會令到人好困擾。
不過水能載舟，亦能覆舟，Deepfake 唔係淨係會帶嚟負面嘅影響，佢的確為帶嚟好多方便㗎，只要大家用喺正途上面，喺唔同產業上都係有正面嘅幫助。只要大家平時留意多啲，唔好比人有機可乘就唔係問題啦💪🏻
