科技發展真係好快，AI 嘅普及、智能家居熱潮等都係我哋要知道嘅嘢，唔緊貼番個科技發展就真係 outdated 喇🫨而物聯網 IoT 正正就係近年現代科技嘅一個重要領域，佢究竟點樣改變我哋嘅世界同生活？企業點樣應用佢先可以把握機遇，快人一步實現到真・數碼轉型❓
🌟咩係物聯網 IoT❓
佢係一個龐大嘅網絡，亦係一種集體嘅網絡技術，令到實體世界嘅物件通過網絡去令大家可以做到無縫通訊，即係喺最少程度嘅人力介入就可以做到分享同收集資料，大家淨係需要透過物聯網嘅網絡就可以輕鬆咁處理到唔同嘅事，最簡單嘅例子就係智能家居。
而物聯網嘅系統有三個部分，分別係智慧型裝置、佢嘅應用程式同圖形化嘅使用介面。只要物件係有sensor 同運算能力，例如電視、監控攝錄機 同車等就可以透過網絡同物聯網應用程式就可以實現到用一部手機或者電腦將佢哋收集到嘅資訊去做決策，例如自動開關電視、隨時隨地睇到屋企嘅情況，遙距通訊屋企人等等。
🌟物聯網嘅應用例子
1️⃣ 智能家居：
呢個係最容易接觸到嘅例子，透過物聯網技術將屋企嘅電器做到遠程控制，甚至係自動化運作，例如出門口唔記得熄電視同燈，直接開個 app 就可以直接做到，有啲仲可以感應到冇人就自動熄燈。
2️⃣ 智能城市：
利用佢可以解決基礎設施、健康同環境方面嘅問題，例如自動測量空氣質素同輻射水平、用智慧型照明系統去減少能源消耗，又或者將交通燈、公共交通工具、監控攝影機等組成一個智能網絡去提高城市嘅管理效率。
3️⃣ 健康追蹤：
可以著一啲嘅設備同感應器去實時監測個人健康狀況，仲會將數據傳送比醫生做分析。
4️⃣ 企業優化：
喺企業層面上嘅應用好多元化，喺製造業方面，機械人同感應器互相溝通，邊到有問題會自動停止嗰一條生產線，減低損失同優化效率。
而零售業方面，物聯網嘅應用程式可以有效咁管理庫存、改善客戶體驗同降低營運成本。例如自動推送目標優惠同推廣比客戶、利用重量感應器嘅智慧型貨架自動監控庫存量同會有提示補貨嘅通知，減低非必要嘅人力成本。
🌟物聯網嘅好處
1️⃣ 提升效率：
自動化同智能化可以大幅度咁提高生產效率，尤其係員工嘅生產力絕對係企業成功嘅關鍵❗透過物聯網可以及時對員工做培訓，減少出錯，亦可以令員工減少咗好多無意義嘅步驟，令員工嘅工作質素提高，自自然然就提升到企業嘅生產力。
2️⃣ 加強客戶關係：
物聯網簡化咗溝通，仲可以透過收集番嚟嘅數據針對性咁喺客戶重視嘅方面部署，加強客戶嘅忠誠度，例如針對性咁提供一啲優惠或者佢哋有興趣嘅產品資訊比特定客戶等。
3️⃣ 提升企業利益：
企業可以將物聯網收集番嚟嘅大數據做深入分析分分鐘可以發現到新嘅商機，甚至有機會開發到一條更受歡迎嘅產品線，提升企業嘅盈利。
4️⃣ 便捷生活：
遠程嘅控制同自動化服務令到日常生活更加方便，冇咩現代人係拒絕到更方便嘅生活。企業針對番呢一方面發展，絕對係一個商機嚟㗎。
🌟物聯網面對緊嘅挑戰係咩❓
1️⃣ 安全性同私隱保護：
呢樣係無辦法去避免嘅問題，越多設備連接去網絡，要面對嘅安全隱患就越多，點樣去解決不法分子去偷取或者洩露你嘅公司同客戶資料係一個重要嘅問題。
2️⃣ 兼容性：
唔同嘅設備同平台嚟自唔同嘅生產商，佢哋之間並未有統一嘅標準，兼容性嘅問題令到整合變到好難，即係使用者可能有 n 咁多個應用程式去管理同操控唔同嘅設備，根本冇辦法整合到。
物聯網嘅方便程度相信喺未來嘅發展會再進一步，發展一個新嘅商機已經唔係少部分人先可以做到，只要你先一步去了解同學習，再加以分析，就會快人一步成功咁拓展自己嘅業務。至於面臨嘅挑戰，只要做好準備，及時更新自己對電腦病毒、新型科技詐騙資訊，相信都唔會有好大嘅問題嘅。
