如果你係超級科幻片迷，尤其係鍾意睇關於人工智能嘅戲，你一定聽過科幻作家以撒．艾西莫夫發表嘅「機器人三大法則」😎呢三大法則對科幻片或者小說又好，對一啲優秀嘅學者又好都有好大嘅影響，尤其係近呢幾年 ChatGPT 嘅出現都明顯睇到 AI 人工智能嘅進步，就連 Facebook 睇到嘅片同 post、Google 睇到嘅廣告等都係由演算法去決定，咁究竟呢三大法則有冇被淘汰呢？
🌟機器人三大法則
1️⃣ 機器人唔可以傷害人類，或者見到人類受到傷害嘅時候袖手旁觀。
2️⃣ 機器人必須服從人類嘅命令，除非呢條命令同第一條法則有矛盾。
3️⃣ 機器人必須保護自己，除非呢種保護同上面兩條法則有矛盾。
呢三條法則睇落好清晰，但係到應用嘅時候就有啲模糊喇，例如一個人類受傷害可以救到 30 條人命，但法則上係唔容許傷害人類，咁究竟救邊個呢❓又或者自動駕駛嘅時候，如果撞到一個人，車入面一家四口唔洗撞樹受傷亡，咁又要點做❓諗深一層，大家要點樣同人工智能共存呢❓
🌟 AI 人工智能嘅六大法則
喺而家 AI 興起活躍嘅時候，好似科技界先驅 Alan Kay 話齋👉🏻預測未來最好嘅方法就係發明佢❗無可否認嘅係唔可以傷害人類係重要嘅事，但更重要嘅係大家點樣用佢嚟幫手，而唔係用佢嚟完全取代人嘅工作。而 Microsoft CEO 講嘅六大法則似乎更加貼合而家嘅趨勢。
1️⃣ AI 必須能夠輔助人類：
其實 AI 嘅出現唔係用嚟取代人類，而係輔助大家去做一啲人力未必做到或者好危險嘅嘢，例如採礦等。
2️⃣ AI 必須係透明化：
大家唔只需要 AI 機器，仲要係可以理解到佢嘅原理同規則。AI 嘅學習需要了解各式各樣嘅知識，但其實人類都要去了解佢，了解科技係點樣睇同分析呢個世界，道德同設計都係唔可以缺少。
3️⃣ AI 喺唔傷害人嘅尊嚴下最大限度咁提升效率：
佢需要維護唔同嘅文化，增加佢哋嘅多樣性。大家需要更廣泛同深入咁喺唔同層面上參與系統嘅設計，科技唔應該用嚟決定未來嘅價值觀同美德。
4️⃣ AI 必須考慮私隱：
佢唔係一種機器去比大家竊取個人同團體嘅資料，而係對私隱要有保障，咁大家對 AI 先會有信任。
5️⃣ AI 承擔演算法嘅責任：
必須要針對預期同意外嘅情況去設計 AI，所以佢要承擔番演算法嘅責任，咁就可以盡量避免到意外發生帶嚟嘅傷害。
6️⃣ AI 必須防止偏見嘅出現：
AI 必須要係客觀去分析任何事，咁先可以進行到有代表性同認受性嘅研究，咁先確保到唔會有歧視問題嘅出現。
其實呢六大法則都有包含到三大法則入面講到嘅唔可以傷害人類，只不過更加具體同中立去講 AI 同人類之間嘅共存，盡量唔損害到人類嘅利益，反而屬於輔助人類嘅角色。但係，其實大家都可以想像到 AI 係未來真係可能會越嚟越似人類，可以做到更深層次嘅交流，為咗可以一齊共存，呢四樣嘢真係唔可以缺少👉🏻同理心、教育、創造力同埋判斷同責任。無論 AI 將來有幾似人類都好，其實佢都好難複製到人嘅同理心同創造力，所以教育係一定唔可以缺少，而且將來嘅大家即使係由 AI 做法官去判罪都好，大家嘅判斷都必須保持，亦要承擔番責任。
你有冇諗到 AI 仲有冇更好嘅法則去同人類更完美咁共存呢？
