喺 9 月 Hacker 入侵數碼港共享硬碟令 400 GB 嘅資料外洩，包括部分員工及高層身份證號碼、地址、薪金等個人資料等，令全港嘩然🥶呢件事話比你知敏感嘅個人或企業資料絕對要利用更安全嘅方法去保護🛡️而家話你知網絡世界嘅安全守護盾 — 加密（Encryption）及雜湊（Hash）
大家成日都聽到嘅加密（Encryption），究竟原理係咩？
👉🏻加密係將資料改變為難以讀取嘅密文內容，只有擁有解密方法嘅人經由解密過程（Decryption）先可以令密文還原做正常可讀嘅資料內容。打個比喻，當你用隱形墨水寫低秘密訊息時，表面上則用普通墨水寫咗一首歌，只有懂得用特殊方法嘅人先可以令隱形訊息顯現，否則收到嘅人只會睇到一首歌。加密就係正正用一啲難以理解嘅密文將資料隱藏其中，只有知道金鑰🔐嘅人先可以還原資料，咁做可以更安全咁儲存資料。
但係唔係所有資料都需要還原，只需要一個程序去驗證正確與否，就好似登入密碼，基本上除咗使用者，平台根本冇需要去知道，只要登入時驗證到密碼係啱就得喇！咁你就需要利用到雜湊呢個技術🔐而家話你知雜湊（Hash）嘅原理👇🏻
雖然加密同雜湊通常都會一齊用，但大家必需知道雜湊唔係加密！雜湊係將資料透過其演算法將資料轉換成固定長度嘅雜湊值。雜湊值長度並唔會因為資料嘅長短而作出變化，而且雜湊值係幾乎不可逆，亦都好似你嘅指紋一樣，基本上唔會出現唔同嘅資料計算出相同嘅雜湊值。而且，雜湊仲可以確保資料喺傳輸或儲存過程中冇被篡改。即使 Hacker 偷取到主機資料都無法得到原本嘅資料密碼，安全程度非常高🛡️
喺保護資料及密碼嘅技術上，加密及雜湊的確係一樣為咗保護資料而設計，但加密係可逆⭕，而雜湊係不可逆🚫，兩種技術喺用途上完全唔一樣㗎！而兩種技術喺網絡世界中扮演重要嘅角色，確保你嘅資訊安全不受 Hacker 侵害🦾
