除咗瞓覺，大家每日上網嘅時間分分鐘佔咗生活嘅六成，大部分時間都機不離身。但你又有冇諗過原來上網呢個行為嘅背後係好複雜🫨❓，當我哋輸入網址想瀏覽網站嘅時候，其實係經歷咗一個複雜嘅查詢過程🔎。呢個過程就係依賴 DNS（Domain Name System，域名系統）。DNS 嘅工作就好似手機電話簿一樣📱，將我哋熟悉嘅網域名稱（例如 www.example.com）轉換成電腦或手機能夠理解嘅 IP 地址（例如 192.0.2.1）。如果冇咗 DNS，我哋就好似冇咗聯絡人嘅電話號碼一樣，電腦或者手機就唔知道去邊度搵到我哋想訪問嘅網站。
DNS 究竟係點樣運作？👇🏻
1️⃣ 輸入網域名稱：當你喺瀏覽器輸入一個網域名稱後，你嘅設備會向一個 DNS 伺服器提出請求查詢。
2️⃣ DNS 查詢：DNS 伺服器會查詢其數據庫，如果查詢唔到就會向其他 DNS 伺服器進行查詢，直至搵到對應嘅 IP 地址。
3️⃣ 得到回應：當 DNS 伺服器搵到嗰個網域名稱對應嘅 IP 地址，佢就會將呢個信息傳送番去你嘅設備。
4️⃣ 連接網站：你嘅設備利用獲得嘅 IP 地址同目標伺服器建立連接，之後網站嘅內容就會加載同顯示喺你嘅瀏覽器上。
如果冇咗 DNS，我哋就要記住所有網站嘅 IP 地址，正如大家都冇咩可能記得晒所有親朋戚友嘅電話號碼一樣，咁樣對於日常使用互聯網嚟講好唔方便。所以，DNS 同成個互聯網嘅運作係密不可分嘅關係🔩
對於企業嚟講，DNS 就更加重要，無論係網站定電子郵件都會用到，要諗一個簡短易記嘅網域名稱先可以加深客人對你嘅印象，就好似 Apple.com、Google.com 或 [email protected] 咁，用番品牌嘅名稱去做網域名，簡單又易記❗
DNS 都有可擴展性同容錯性，即使某啲伺服器發生故障，都可以確保互聯網維持正常運作，令到互聯網變得更加 user-friendly，輕鬆瀏覽唔同嘅網站及資源，確保終端使用者獲得快速又有回應嘅體驗😍
